في مرة من المرات في معتقل سديه تيمان كان في ضابط عندنا وضابط في القسم المجاور يعني، فكنت أتكلم مع الضابط في القسم اللي عندنا، فأجى الضابط اللي في القسم المجاور بيقول لي أنت تعال. شو قصته الطفل اللي كنت تدور عليه اللي شعره كيرلي في المستشفى كنت تدور عليه؟
فهذا الكلام كان في شهر ثلاثة في منتصف شهر ثلاثة، يعني يمكن في نص رمضان كانت لسه هذا في بداية الاعتقال بعد شهر من الاعتقال. أنا في الحالة هذه صراحة صابني ارتباك شديد وقلقت، فرحت بسرعة قلت له ايش في؟ هذا ابني. ابني؟ بيقول لي اه بعرف.
قلت له طيب ايش صاير؟ ليش سألتني السؤال هذا؟ أنا فكرت إنه صاير إشي لعيلتي وطالع على الإعلام إنه صاير إشي، فمن نوع من، كنت عارف ممكن يصير في الإعلام تذكير بإنه هذه العيلة اللي صار فيها كذا كذا تعرضت لكذا كذا وصار هيك. فصرت أنا أحاول إنه بس أنت فاهمني ايش اللي صاير. صرت أسأل الضابط اللي عندي بقول له ايش في؟ ليش سألني السؤال هذا؟ ايش صاير لعيلتي؟ صاير لهم إشي؟ طبعا هو ما بيعطيكش إشي، بيقول لي لا لا ولا حاجة.
بدي أفهم ايش اللي صاير. طبعا طول الفترة هذه أنا ظليت مرتبك يعني خلص بديت أنهار. فهي طبعا كانت محاولة يعني لتوتيري واللعب على نفسيتي.